بلده شیم یک ورق رای گیری بلده مجلس قانونگذاری دده موشه.
شیمو بلده عضوی که قراره از حوضه انتخاباتی که شیمو زندگی مونید نمایندگی کنه رای می دید. که یکی از 93 حوضه د کوئینزلند استه.
انتخابات توسط روشی بنام رای گیری ترجیحی کامل تصمیم گیری موشه. رای دهندگان کاندیدها ره نظر به ترجیح خو از بالاترین (اولین انتخاب) تا کمترین ترجیح خو درجه بندی مونن. بلده ازیکه انتخاب شونه، یک کاندید باید باد ازیکه تمام دیگه کاندیدا حذف موشه، توسط اکثریت رای دهندا د اولویت قرار بیگره.
روش رای گیری ترجیحی کامل به ای معنی یه که اگه شیمو بلده یک کاندیدی که کمتر مشهور استه یا یک حزب ریزه منحیث اولین ترجیح خو رای بیدید، و اونا برنده نشنن، از رای شیم هنوزم بلده انتخاب نماینده شیم استفاده موشه.
بلده رای ددون درست د ورق رای دهی، شیمو باید تمام خانای جدول ره به ترتیب انتخاب خو شماره گذاری کنید.
آرای غیر رسمی
یک ورق رای گیری که به صورت درست تکمیل نشده باشه بنام رای غیر رسمی شناخته موشه. آرای غیر رسمی بلده نتیجه انتخابات حساب شده نه میتنه. یک ورق رای گیری وقتی غیر رسمی د نظر گرفته موشه که کدام کس:
اشتباه کیدو
اگه بله ورق رای گیری خو کدم اشتباه کدید، کدم مشکل نیسته. می تنید بله شی خط کشیده و شماره درست ره د پالوی شی نوشته کید.
اگه به تشویش استید که ECQ چیزی که شیمو اصلاح کیدید ره نه موفامن، می تنید ورق رای گیری خوره به ECQ پس دده یک ورق نو بیگرید.
اگه ورق رای گیری از گیر شم خراب شده یا پاره شونه، می تنید ورق رای گیری خوره به کارمند انتخابات پس دده یک ورق نو بیگرید.
همچنین می تنید د تکمیل کیدون ورق رای گیری خو درخواست کمک کنید.
رای شیم فقط به انتخاب خود شیم استه
ای مهم استه بوفامید که فقط خود شیم می تیند تصمیم بیگرید که بلده چی کسی رای میدید. دیگه نفرا می تینن پیشنهاد کنن که بلده چی کسی رای بیدید ولی نه می تنن بله شیم فشار بیره که از دل ازوا رای بیدید. باوجودیکه پیش از رای گیری نام شیم قد فهرست انتخاباتی سر دده موشه، ولی رای شیم باد از ریی کیدو ناشناخته و مخفی استه.
ای د دست خود شیم استه که بخوایید قد دیگه مردم بوگید یا نه که بلده از کی رای ددید. هیچ کس بله شیم فشار اورده نمیتنه که قد شی بوگید، حتی مقامای دولتی. اگه خود خوره ناامن یا تحت فشار احساس مونید، غیر قانونی نیسته که د باره کسی که رای ددید دروغ بوگید و هیچ کس فامیده نه میتنه که بلده چی کسی رای ددید بخاطریکه رای شیم مخفی استه.
