حکومت محلی پایین ترین سطح حکومت داری د استرالیا استه. به حکومتای محلی معمولاً شوراهای شهر، شاروالی ها یا بلدیه ها گفته موشه. د استرالیا 537 حکومت محلی وجود دیرن، که هرکدم شی یک شهر، منطقه، ناحیه شهری یا دهاتی مختلف ره نمایندگی مونه. د یک حد متوسط یک حکومت محلی 30،000 نفر ره تحت پوشش خو قرار میدیه ولی باضی یای شی مانند شورای شهر بریزبین (Brisbane City Council ) زیادتر از یک ملیون نفر ره تحت پوشش خو قرار میدیه.
اکثر مردم به ای باور استن که حکومت محلی او قدر مهم نیسته بخاطریکه حکومتای ایالتی و قلمروها تصمیمای کلان ره میگرن که بله اقتصاد و جامعه گسترده تر تاثیر مونه.
حکومت محلی مهم استه. اونا تصمیمایی ره میگرن که مستقیماً بله خود شیم، جامعه شیم و کیفیت زندگی د منطقه ای که شیمو زندگی مونید تاثیر مونه. نظر به هر ایالت یا قلمرو، اونا تصمیما و قانونای ره که (by-laws) گفته موشه د باره مسائلی مانند تعرفه ایکه مالکان خانه باید پرداخت کنن (مالیه زمین)، نقشه زمین و اجازه ساخت و ساز، امکانات اجتماعی و ورزشی، زیرساخت ترانسپورت محلی و خدمات ضروری مانند سیستم های آب و فاضلاب و جم آوری زباله اتخاذ مونن.
ثبت نام بلده رای گیری د انتخابات حکومت محلی
تمام رای دهندگان واجد شرایط باید بلده رای گیری ثبت نام کنن. وقتیکه بلده رای گیری ثبت نام مونید، بلده انتخابات کامنویلت (Commonwealth)، ایالتی (State ) و حکومت محلی ثبت نام موشید. شیمو می تنید ثبت نام خوره به صورت آنلاین چک کنید.
مه یک شهروند استرالیا نیستوم. آیا می تنوم رای بی دیم؟
د استرالیای جنوبی، تاسمانیا و ویکتوریا، اگه شهروند استرالیا نباشید امکان شی وجود دیره که د سطح حکومت محلی رای بیدید. بلده کسب مالومات زیادتر انتخابات ایالتی ره د قسمت زیر توخ کید.
د دیگه ایالتا و قلمرو شمالی، بلده رای ددو باید یک شهروند باشید.
آیا مه باید رای بیدیم؟
اگه د استرالیا بلده انتخابات ایالتی، قلمرو یا فدرال واجد شرایط باشید، رای ددو د انتخابات حکومت محلی معمولاً جبری استه. اگه بدون کدم دلیل معقول رای نه دید، شاید یک جریمه دریافت کنید.
د استرالیای جنوبی استرالیای غربی جبری نیسته.
طریقه کار حکومت محلی چی رقم استه
طریقه کار حکومتای محلی د هر ایالت و قلمرو فرق مونه. به طور عموم، یک حکومت محلی متشکل از تقریباً 9 تا 15 عضو استن که بنام عضو شورا (councillor) یاد موشن که بلده مدت چهار-ساله انتخاب موشن. ای اعضای شورا می تنن اعضای حزبای سیاسی یا مستقل باشن.
رئیس منتخب یک حکومت محلی اکثراً بنام شاروال یا رئیس گفته موشه.
اعضای شورا اکثراً تصمیمای حکومت محلی ره با رای اکثریت د یک مجلس شورا، که یک پارلمان حکومت محلی گفته موشه، میگرن. باضی وقتا اگه رای هر دو طرف اعضای شورا برابر باشه، خود شاروال یا رئیس می تینه یک رای تصمیم گیرنده دیشته باشه.
حکومتای محلی نمی تنن مجلس بالا یا پایین دیشته باشن. فقط یک مجلسِ حکومت بلده رای گیری وجود دیره.
انتخابات
شیمو نماینده خوره د حکومت محلی از طریق انتخابات انتخاب مونید. هر ایالت و قلمرو بلده طریقه کار حکومت محلی قانونای مختلف دیرن. بلده کسب مالومات از جایی که شیمو زندگی مونید لطفاً قسمت زیر ره بینگرنید.
قلمرو پایتخت استرالیا ای سطح حکومت ره ندره و انتخابات حکومت محلی در شی برگزار نه موشه. مجلس قانونگذاری مسئولیتای یک حکومت محلی ره به دوش میگره.
