ဒေသန္တရအစိုးရသည် ဩစတြေးလျနိုင်ငံ၏ အုပ်ချုပ်မှုအဆင့်တွင် အနိမ့်ဆုံးအဆင့် ဖြစ်သည်။ ဒေသန္တရအစိုးရများကို များသောအားဖြင့် ကောင်စီများ ၊ စည်ပင်သာယာရေးအဖွဲ့များ သို့မဟုတ် ရှိုင်းယားများဟု ခေါ်ကြသည်။ ဩစတြေးလျနိုင်ငံတွင် ဒေသန္တရအစိုးရ 537 ခုရှိပြီး တစ်ခုစီသည် မတူညီသော မြို့ကြီး၊ မြို့ငယ်၊ မြို့ပြ သို့မဟုတ် ဒေသကို ကိုယ်စားပြုသည်။ ဒေသန္တရအစိုးရသည် ပျမ်းမျှအားဖြင့် လူပေါင်း 30,000 ခန့်ကို လွှမ်းခြုံသော်လည်း ဘရစ်ဘိန်းမြို့တော်ကောင်စီ (Brisbane City Council) ကဲ့သို့ ဒေသန္တရအစိုးရအချို့သည် လူတစ်သန်းကျော် လွှမ်းခြုံထားသည်။
ဖက်ဒရယ်နှင့် ပြည်နယ်နှင့်နယ်မြေအစိုးရများသည် စီးပွားရေးနှင့် လူ့အဖွဲ့အစည်းအပေါ် သက်ရောက်မှုကြီးမားသော ဆုံးဖြတ်ချက်များ ချမှတ်သည့်အတွက် ဒေသန္တရအစိုးရသည် အရေးမကြီးဟု လူအများက ယူဆကြသည်။
ဒေသန္တရ အစိုးရသည် အရေးပါပါသည်။ ၎င်းတို့သည် သင်၊ သင့်အသိုင်းအဝိုင်းနှင့် သင်နေထိုင်ရာဒေသရှိ ဘဝအရည်အသွေးကို တိုက်ရိုက် အကျိုးသက်ရောက်စေသော ဆုံးဖြတ်ချက်များကို ချမှတ်သည်။ ပြည်နယ် သို့မဟုတ် နယ်မြေတစ်ခုစီပေါ် မူတည်၍ ၎င်းတို့သည် အိမ်မြေပိုင်ရှင်များ ပေးရသည့်နှုန်းထားများ (မြေယာအခွန်များ)၊ အဆောက်အအုံစီမံကိန်းနှင့် တိုးချဲ့မှုအတည်ပြုချက်၊ ရပ်ရွာနှင့် အားကစားအဆောက်အအုံများ၊ ဒေသတွင်း သယ်ယူပို့ဆောင်ရေး အခြေခံအဆောက်အအုံများနှင့် ရေနှင့်မိလ္လာစနစ်များနှင့် အမှိုက်သိမ်းဆည်းခြင်းစသည့် မရှိမဖြစ်လိုအပ်သည့် ဝန်ဆောင်လုပ်ငန်းများနှင့် ပတ်သက်၍ ဆုံးဖြတ်ချက်များနှင့်ဥပဒေများ (မြို့ပြစည်းမျဉ်းဥပဒေများ) ချမှတ်သည်။
ဒေသန္တရ အစိုးရ ရွေးကောက်ပွဲတွင် မဲစာရင်းသွင်းခြင်း
မဲပေးနိုင်သော မဲဆန္ဒရှင်များအားလုံး မဲစာရင်းသွင်းရမည်။ သင် မဲ စာရင်းသွင်းသည့်အခါ သင်သည် ဓနသဟာယ (Commonwealth)၊ ပြည်နယ် (State) နှင့် ဒေသန္တရအစိုးရရွေးကောက်ပွဲများအတွက် စာရင်းသွင်းခြင်း ဖြစ်သည်။ သင်သည် သင်၏ မဲစာရင်းကို အွန်လိုင်းတွင် စစ်ဆေးနိုင်ပါသည်။
မိမိသည် သြစတြေးလျနိုင်ငံသား မဟုတ်ပါ။ မဲပေးနိုင်ပါသလား။
တောင်ဩစတြေးလျ၊ တက်စ်မေးနီးယားနှင့် ဗစ်တိုးရီးယားပြည်နယ်များတွင် ဒေသန္တရအစိုးရအဆင့်၌ သြစတြေးလျနိုင်ငံသား မဟုတ်သော်လည်း မဲပေးနိုင်ပါသည်။ ပိုမိုသိရှိလိုပါကအောက်ပါ ပြည်နယ်အပိုင်းများကို လေ့လာပါ။
အခြားသော ပြည်နယ်များနှင့် မြောက်ပိုင်းနယ်မြေတွင် သင်သည် မဲပေးရန်အတွက် နိုင်ငံသားဖြစ်ရန် လိုအပ်သည်။
မိမိ မဲပေးရမလား။
သြစတြေးလျနိုင်ငံရှိ ပြည်နယ်၊ နယ်မြေ သို့မဟုတ် ဖက်ဒရယ်ရွေးကောက်ပွဲအတွက် မဲပေးနိုင်သူ ဖြစ်ပါက ဒေသန္တရအစိုးရ ရွေးကောက်ပွဲများတွင် မဲပေးခြင်းသည် ပုံမှန်အားဖြင့် မဖြစ်မနေ လိုအပ်ပါသည်။ လက်ခံနိုင်စရာအကြောင်းပြချက်မရှိဘဲ မဲမပေးခြင်းအတွက် သင် ဒဏ်တပ်ခံရနိုင်သည်။
ဩစတြေးလျနိုင်ငံ တောင်ပိုင်းနှင့် အနောက်ပိုင်းတို့တွင် မဖြစ်မနေ မလိုအပ်ပါ။
ဒေသန္တရအစိုးရများ၏ အလုပ်လုပ်ပုံ
ဒေသန္တရအစိုးရများသည် ပြည်နယ်နှင့် တိုင်းဒေသကြီးအသီးသီးတွင် ကွဲပြားခြားနားစွာ လုပ်ဆောင်ကြသည်။ ယေဘုယျအားဖြင့် ဒေသန္တရအစိုးရကို လေးနှစ်ကြာသက်တမ်းအတွက် ရွေးချယ်ခံထားရသော ကောင်စီဝင်ဟုခေါ်သည့် အဖွဲ့ဝင် ကိုး-15 ဦးခန့်ဖြင့် ဖွဲ့စည်းထားသည်။ ဤကောင်စီဝင်များသည် နိုင်ငံရေးပါတီများ၏အဖွဲ့ဝင်များ သို့မဟုတ် တစ်သီးပုဂ္ဂလများ ဖြစ်နိုင်သည်။
ရွေးချယ်ခံရသော ဒေသန္တရအစိုးရ၏ အကြီးအကဲကို မြို့တော်ဝန် သို့မဟုတ် ဥက္ကဌဟု ခေါ်ဆိုလေ့ရှိသည်။
ကောင်စီဝင်များသည် ဒေသန္တရအစိုးရအဖွဲ့၏ ဆုံးဖြတ်ချက်များကို ကောင်စီရုံးခန်းတွင် မဲအများစုဖြင့် ဆုံးဖြတ်လေ့ရှိသည်။ တစ်ခါတစ်ရံတွင် ကောင်စီဝင်များအကြား ကွဲလွဲမှုတစ်စုံတစ်ရာရှိပါက မြို့တော်ဝန် သို့မဟုတ် ဥက္ကဌသည် ဆုံးဖြတ်မဲ ပေးနိုင်သည်။
ဒေသန္တရအစိုးရများတွင် အထက်လွှတ်တော်နှင့် အောက်လွှတ်တော်မရှိပါ။ မဲပေးရန် အစိုးရရုံးခန်းတစ်ခုသာရှိပါသည်။
ရွေးကောက်ပွဲများ
ရွေးကောက်ပွဲများမှတစ်ဆင့် ဒေသန္တရအစိုးရတွင် သင့်ကိုယ်စားလှယ်များကို ရွေးချယ်နိုင်ပါမည်။ ပြည်နယ်နှင့် နယ်မြေအသီးသီးတွင် ဒေသန္တရအစိုးရ ရွေးကောက်ပွဲများ မည်သို့လုပ်ဆောင်သည်နှင့် ပတ်သက်၍ မတူညီသော စည်းမျဉ်းစည်းကမ်းများရှိသည်။ ကျေးဇူးပြု၍ သင်နေထိုင်ရာနေရာမှ သတင်းအချက်အလက်များအတွက် အောက်တွင်ကြည့်ပါ။
ဩစတြေးလျနိုင်ငံ၏ မြို့တော်နယ်နိမိတ်တွင် ဤအဆင့်အစိုးရနှင့် ဒေသန္တရရွေးကောက်ပွဲများ မရှိပါ။ ဥပဒေပြုလွှတ်တော် (Legislative Assembly) သည် ဒေသန္တရကောင်စီ၏ တာဝန်များကို လုပ်ဆောင်သည်။
